中文大學新聞及傳播學院校友會喺二○○三年為紀念校友慶祝中大創辦四十年，主辦咗一個「中大新聞獎」，極受歡迎，但限於財力人力，只能每兩年搞一次，今年二○○七年先至係第三屆。新聞系校友多數做記者，唔係賓架、醫生、律師，平均收入較低，回歸十年又碰上傳媒不景，即使整體就業市場非常蓬勃，人人喊加薪，加少啲都走人，但傳媒呢行偏偏唔多掂，新聞記者想話加薪？轉行可也，做自己有興趣之新聞工作，隨時要有減薪嘅心理準備。
雖然捐唔到乜嘢錢，中大新傳校友會仍然堅持繼續將呢個新聞獎辦下去，以表揚香港優秀記者。獎項分文字媒體及電子傳媒兩項，共頒發八個獎，得獎人分別係陳旭權（《南華早報》總採訪主任，樹仁新聞系畢業）、陳沛敏（《蘋果日報》副採訪主任，中大工管系畢業）、陳志偉（《明報》首席記者，中大新聞系畢業）、曾仲榮（《經濟日報》副總編輯兼總主筆，中大新聞系畢業）、王玉娟（無綫電視首席編輯，理大語文及傳意學院畢業）、呂秉權（有線電視駐上海新聞中心主任，浸大傳理系畢業）、林建誠（有線電視駐廣州記者）、張宏艷（有線電視新聞部總主播，中大新聞系畢業）。
頒獎禮在恒生銀行博愛堂舉行，當日（十二月三日）嘅主禮嘉賓係財政司司長曾俊華，頒獎前致詞，大家都以為會係講客套話，冇乜料到，點知曾司長講完甘迺廸總統讚賞《紐約時報》之後，突然加多一段：「講起選舉，大家都會想起昨日剛舉行的立法會港島地區地方選區補選。首先我要祝賀陳太當選。政府將會本着一貫的政策，跟陳太和其他立法會議員一齊努力，做好立法會餘下的工作。」陳太話曾特首冇致電祝賀佢，唔通曾司長特登趁此機會，在好多好多傳媒老總、資深編輯記者面前，為特區政府補番一段祝賀之辭？曾司長認真識做公關！
今年新傳校友會除廣邀資深傳媒人觀禮外，仲特別請埋啲大集團傳訊總監/董事/總經理到場，包括和黃、國泰、中電、港燈、新創建、科大、中大等等。難怪嘅，因為今屆嘅中大新傳校友會主席正是公關高手，恒生銀行助理總經理張樹槐吖嘛。