車路士後衛大衛雷斯喺星期日球隊賽和阿仙奴0:0嘅英超聯賽尾段領紅被逐，原來呢位巴西球星之前撞埋廣告板度受傷，喺手腕骨折嘅情況下踢咗超過40分鐘先至被逐離場！

30歲嘅大衛雷斯喺對阿仙奴嘅比賽臨完上半場意外撞埋場邊廣告板度左手受咗傷，但佢都堅持繼續比賽，踢到87分鐘因為飛鏟哥拉辛拿斯而領紅，即係話佢喺手腕骨折之下仲踢咗超過40分鐘比賽，果然係一條硬漢。由於大衛雷斯被罰喺英格蘭本土賽事停賽三場，要到10月14號車仔對水晶宮先可以復出，但下星期作客馬德里體育會嘅歐聯分組賽就唔受影響。