當年今日
關於我們
隔牆有耳:肥彭講女人唔講煲呔 - 李八方
蘋果日報 2008/11/08 00:00
末代港督肥彭每次重臨香港,都引起一陣熱潮,大家咁掛住佢,民心所向顯而易見。佢今次離開前接受香港電台訪問,透露此行曾私下以朋友身份見過煲呔,喺禮賓府(即係前港督府)見面定其他地方佢冇透露。
冇諗過要教煲呔
煲呔民望一沉不起,主持人問肥彭,有冇私人醒幾招過煲呔?肥彭聽到呢個問題O咗嘴,強調「發夢都冇諗過」咁做,又話煲呔亦唔應該問佢,因為佢已經離開香港11年,唔適合再做「教車師傅」嘞。
肥彭講到煲呔就封口,講女人卻停唔到口,大讚香港好多女性都對民主進程有貢獻,主持抽秤佢何解偏愛女人,佢話「因為自己都係阿媽生」,加上有三個女,又有三個孫女,所以一向好重視女人。肥彭自言政治生涯已完,日後會繼續寫書同做牛津大學校長,12月會帶孫女去澳洲過聖誕,臨別贈歌,佢送首披頭四《AllMyLoving》畀香港人。