頭先講到馮允謙新歌《葡萄釀的淚》有一句歌詞係「多一歲　多一歲十了大歲」.....「十了大歲」?定「大了十歲」?馮允謙的確係唱「十了大歲」，字幕亦都係打「十了大歲」....咁即係...冇錯?咁冇錯，「十了大歲」係點解呢?

英皇方面就回覆本報話冇唱錯，理由係:「隻歌講同朋友飲紅酒，飲到醉醉哋，特登玩錯摸，好似平時話紅都面晒，歌詞幽一默。」之後馮允謙亦以同一口徑回應:「最近好多人問我『十了大歲』係咩嚟，唔makesense嘅，我想補充下，內容係講兩個朋友好耐冇見，見返飲酒，飲得好多會醉，所以林若寧捉咗呢句幽咗一默，咁我呢啲外國ABC，講中文飲醉酒咁，有時飲醉面都紅晒，可能會話紅都面晒唔makesense，就寫咗呢句。」

之但係....填詞嘅林若寧，似乎冇同英皇及馮允謙冇夾過口供，佢直認係自己打錯字:「其實係我打錯字，純粹打錯字，『十』同『大』打簡易時候，『J』同『K』兩個碼係好近，我疏忽冇再細睇番歌詞。（英皇解釋歌詞冇錯喎?）可能佢哋唔會覺得我會犯呢啲咁低級錯誤，佢哋信我嘅，如果大家聽到歌詞覺得好不安，我saysorry，唔關佢哋事，唔好意思搞到馮允謙。我諗佢哋太信任我，冇理由踢波擺烏龍賴守龍門守唔到。」

英皇方面聽到林若寧嘅回覆後，亦再次回應話：「製作部一直以為林若寧係咁寫，特登切合馮允謙嘅ABC形象寫，啱啱先知林若寧話係佢錯失，冇辦法，美麗誤會！」咁即係馮允謙同英皇都從來冇問過林若寧係咩意思，就通過晒所有製作，真係好信好信佢喎!

依家要學好中文都幾難，俾「紅都面晒」、「明張目膽」、「子烏虛有」、「雞毛鴨蒜」呢啲「treegun體」搞到有時都唔記得邊個係正字！