正喺日本度假嘅李克勤，佢同太太盧淑儀一齊先後去咗東京、函館等，呢兩日佢不時係Instagram上載佢哋去過嘅地方。佢都成日去日本，仲有啲咩新地方未去過呢？

噚日克勤上載咗一段片，佢好似旅遊大使咁喺片度作介紹，原來佢去咗搭舊年5月先通車嘅「四季島號列車」。片段中着住粉紅危T恤嘅克勤介紹話︰「呢個係四季島列車，依家喺上野車站上車，佢係日本觀光列車。」佢仲留言寫住︰「人生第一次火車旅遊。」另一段片見到克勤坐喺行駛中嘅餐廳車卡，好享受咁嘆緊香檳，佢仲留言︰「又真係幾好玩喎！」

到咗今早克勤換咗衫，上載咗一段佢吊魷魚嘅片，佢都幾輕易就吊到，之後仲睇到隻魷魚已經被劏，變成刺身嚟食，佢留言話︰「今早火車來到函館。」之後佢仲有一段片，見到克勤攞住支結他邊彈邊唱佢嘅歌《只想你會意》，佢仲寫住︰「帶埋結他上火車。」同埋tag住話，價錢好貴但房間好細。至於佢老婆盧淑儀，上載咗只見克勤背脊正幫佢影緊相嘅相。

講到呢架列車有幾巴閉，舊年5月通車時，已經話book到今年3月，而且價錢唔平，一人消費起碼要2萬蚊，最貴就要7萬蚊港紙，係港紙唔係日元。點解咁貴，原來呢架列車有10節車廂，但只有6節供乘客坐，每卡只坐6位乘客，同埋只有17間獨立房，所以每次行駛，只可以載36人。行程方面只有兩種，4日3夜由上野去函館，之後再返回上野，每人收費75萬至95萬日元（約53,000至68,000港元）；另一個2日1夜行程，就係上野去長野縣，每人收費由32至45萬日元（約22,000至32,000港元），睇嚟克勤選擇4日3夜行程，唔怪得網民留言話佢好富貴。

精選娛聞，喺晒《娛果》
http://fb.com/appledailyent