四年一度嘅世界盃噚晚開鑼，由主辦國俄羅斯大勝沙地阿拉伯5球揭開戰幔，呢場比賽，除咗俾鏡頭捕捉到嘅陳奕迅，仲有一班事先張揚會去睇波嘅明星足球隊！為ViuTV主持世界盃遊戲節目嘅林敏驄，噚晚有喺facebook開live，以第一身視角同大家睇波，見到有足球評述員細鬼，仲有戴志偉、譚詠麟等人，阿驄喺主隊一波一刻即刻開live，仲聽到譚校長話：「5分鐘一球，15分鐘又一球呀！」結果佢真係開口中。

《蘋果》今日問過阿驄喺現場睇世界盃揭幕戰有乜感受？佢好開心咁話：「今屆安排好好，啲位好靚，直頭好近球員，以前坐到好遠，好似粒米咁走來走去，所以睇多好多嘢！尤其開幕表演，上次歐聯嗰個好勁，今次俄羅斯都唔蝕底，近距離好好睇，切身感受，隔住電視睇唔到，人浪呀，一齊玩呀，又有大旗喺你頭頂傳呀咁！」

阿驄又話：「雖然第一場揭幕，俄羅斯對沙地亞拉伯，但現場好多球迷著唔同國家球衣，相信佢哋除咗捧自己國家，會睇好場波，氣氛好有感染力，入場唱國歌真係有啲感動。」阿驄又讚今次個球場好靚：「草地靚到好似床襑咁，踩落去無聲嘅，真係幾鬼正！」

之後會唔會睇埋巴西？阿驄話：「梗係想睇，但唔知有冇飛睇，如果坐到開幕呢啲位睇到自己鍾意球星，真係無得頂呀！總之今次感覺完全唔到，以前一粒米咁，入咗波又無慢鏡頭，只可返去睇重播，今次真係好有震憾力，睇世界盃係錢都買唔到嘅開心！」

一網睇盡
足動世盃 直擊俄國最前線
https://hk.feature.appledaily.com/worldcup2018/