李克勤一連9場嘅演唱會噚晩喺紅館完滿落幕，校長譚詠麟擔任尾場嘉賓，阿倫完成任務之後，到克勤唱《你是我的太陽》嘅時候，就梗係望住老婆唱啦！而老婆大人盧淑儀個樣，當然係非常感動。

接近演唱會嘅尾聲，克勤又話：「我覺得每個人應該有夢想，冇，就等於一個粉腸，我嘅夢想，舊年加入公司執導MV《一個都不能少》，希望喺2018年，可以做導演拍電影，多謝老闆聽完我講嘅故仔，即刻答應，仲問我需要幾多錢，又話會搵人寫劇本，我話唔使，佢非常好。」克勤笑話，計過紅館每場有1萬2千幾觀眾，個個都入場睇電影，就有千萬票房，9場加埋，老闆就唔使蝕。

最後encore，克勤唱《紙牌屋》時，竟然老貓燒鬚唔記得歌詞，好尷尬伸脷兼自嘲話：「又一次證明有啲嘢係會被傳染嘅，有個朋友成日唔記得幾句，對方答我『你得一兩首金曲，梗係記得到，我有咁多首金曲，梗會記唔到喇！』」好明顯，講緊嘅係阿倫。

到唱最後一首歌時，克勤叫台下觀眾開着手機燈，佢望住台下嘅畫面之後，感動到唱唔到，停咗幾次，跟住全場和唱完成最後一首歌。

完騷之後，克勤出席慶功宴，佢話：「衷心感激阿倫，《一個人飛》佢好少唱，所以想早一日去綵排，佢認真誠意十足，仲專登着埋套藍色西裝，去邊度都撐我。」克勤仲話佢哋之後有場世紀羽毛球戰，佢同邱子傑一隊，對戰阿倫同盧淑儀嘅一隊：「呢場波唔知點打，一個係太太，贏咗要返去跪玻璃，一個係校長，贏咗會殺頭。」

講到導演夢，克勤話：「會拍香港特式溫馨小品，過去半年接觸好多前輩。我自己最多只會客串，太太亦唔會演，好想將呢部電影送畀自己，作為50歲嘅生日禮物。去到每個年紀，都應該有夢想。」