英國萬人迷碧咸（DavidBeckham）雖已退役，但魅力依然，太太「碧咸嫂」維多利亞（VictoriaBeckham）近年就努力進軍時裝界，大住肚都照開工設計新裝。碧咸嫂早前在紐約時裝周推出副線VictoriabyVictoriaBeckham，她生完女不久，都抱埋囡囡親自主持發佈會，而碧咸嫂為了這門生意，將於12月中首次東來，去完北京、上海，再殺入香港，更可能踩過澳門出席活動搵真銀。

碧咸效力英超期間，曾經兩次來港，但碧咸嫂就從未到過香港，今次碧咸更罕有地全家六口齊齊出動，包括兩人所生的四名子女：大仔Brooklyn、二仔Romeo、三仔Cruz和月前出世的女兒HarperSeven，都會同行。碧咸一家六口會坐私人飛機東行，由於幾個子女都未去過中國，所以碧咸向有關方面透露，首站的北京之行，最想安排家人登上長城做好漢，接觸中國文化，至於上海就未有特別要求。

香港暫定會是碧咸一家中港行的尾站，碧咸嫂的時裝系列VictoriaBeckham在名店連卡佛和Joyce有售，巡舖和舉行VIP晚宴肯定是指定動作，本地名媛對碧咸嫂來港消息都反應熱烈，而向來吸金能力高企的碧咸夫婦，在港期間更落實會出席幾個商業活動，全力搵真銀，顧及碧咸一家大小，有關方面會暫定除了上海灘、中國會等傳統外國明星鍾意去的地方外，更考慮增玩海洋公園。體育界方面都希望趁碧咸在港，籌備一場慈善足球賽，但未知碧咸意願如可。