踢過車路士、布力般流浪同埋些路迪等球隊嘅英格蘭名宿瑟頓，目前做緊足球評述員，但佢可能估唔到自己雖然都要退咗休，都仲要畀人鏟到飛起。

馬瑟韋爾喺星期日嘅蘇超主場對鴨巴甸，而44歲嘅瑟頓就喺馬瑟韋爾主場菲爾公園球場度，同《BT Sport》主持Darrell Currie喺直播節目Scottish Football Extra show討論緊嘅時候，突然畀同樣係評述嘅馬瑟韋爾名宿、前北愛爾蘭後衛卡拉根喺場邊飛鏟，結果兩個都雙雙趴地，旁邊嘅Darrell就嚇到跳起，真係唔知好嬲定好笑。不過卡拉根飛鏟瑟頓明顯係早有預謀，唔知係咪想向上星期六格拉斯哥流浪主場輸畀些路迪嘅比賽中，格流領隊卡仙拿畀自己球員祖舒韋達斯鏟跌嘅事件致敬呢？

鴨巴甸最終喺呢場比賽以1:0勝出，算係報咗三日前喺蘇格蘭聯賽盃作客以0:3輸畀鴨巴甸之仇啦。

睇片↓↓↓
http://bit.ly/2ynLJ5Q