正所謂一石激起千重浪，外國媒體報道，由於迪亞高哥斯達（DC）重返馬德里體育會嘅關係，令到曼聯喺季尾再出手搶基沙文嘅機會又大咗！

根據報道，隨住曼聯上季透過贏歐霸盃攞到今季歐聯嘅入場券，今年夏天已經盛傳基沙文會入「魔」；紅魔鬼領隊摩連奴一向都好欣賞呢位法國國腳，就連基沙文都準備好。不過，國際足協（FIFA）今年6月對馬體會實施制裁，禁止呢支西甲球隊喺出年1月之前註冊新球員，就令到基沙文「縮沙」，認為喺呢個時候離開馬體會係唔好嘅做法。

曼聯隨後亦都打退堂鼓，但報道無指出呢個決定同基沙文暫時唔願意離開馬體會有無直接關係。接近曼聯嘅消息人士就話，羅致基沙文嘅計劃只係暫時擱置，呢位法國前鋒今個夏天同球會續約多一年嘅關鍵，就係確保合約入面嘅1億歐元（約9.2億港元）贖身條款仍然存在同埋生效，等自己仲有退路。有指依家DC已經重返馬體會，佢哋西上已經有一旦基沙文離隊嘅直接替補，加上球隊出年1月又可以再次投入轉會市場，所以令曼聯翻兜基沙文嘅機會，一下子又大幅增加。