英國傳媒報道，車路士前鋒迪亞高哥斯達（DC）已經將屋企人送返去馬德里，重返馬德里體育會似乎事在必行。

英國《太陽報》報道，雖然車路士將哥斯達列入今季英超大軍名單，但佢今夏去咗巴西度假之後一直未歸隊，佢嘅家人更已經返咗去馬德里而唔喺Surrey。

DC喺倫敦嘅屋企好近車仔訓練場，但佢一直冇返嚟參加操練並且要罰款，《太陽報》就話DC冇打算返去清車仔嘅儲物櫃，之前仲叫隊友去拎佢啲嘢㖭！車仔領隊干地已經講明DC唔喺自己計劃之中，而DC就好希望可以重返上「車」之前踢咗四年嘅馬體會。