香港管理專業協會噚日舉行講座，佢哋請咗唔同界別嘅人嚟講直播熱潮同市場營銷嘅關係。Facebook亞太區The Client Solutions Manager（Tech & Telco）陳日妍話，直播係達到營銷目的嘅計劃之一，但唔係計劃嘅全部，做直播之前要諗清楚點樣先可以吸引到觀眾參與，同埋嗰件事係咪真喺適合做直播，「Live係冇take two，所以需要好多嘅準備，每個Live都係精心策劃，所以內容一定要諗好，件事先可以流暢咁做」。

「未來嘅趨勢都會係片為主，睇返數據，Facebook喺香港嘅滲透率差不多九成。只要用Facebook就可以用Facebook Live，睇Facebook Live，而每日觀看人數亦增加咗4倍。」陳日妍話未來Facebook Live會加入新玩素，例如Live Fundraise，畀人一路直播一路籌款，又例如Live With，主播可以邀請觀眾一齊參與直播，同主播對話。

Yahoo就大搞新意思，開咗個新電視台叫「速食電視」，主打直播港超聯同學界精英比賽，佢哋亦會推出「一蚊網購」，話只要直播觀看人數達標，就可以用一蚊幾將貨物買返屋企。

而騰訊搞嘅本地直播app就喺6月搞咗個「鑽石紅人榜」，睇下邊個主播可以喺粉絲手中收到最多鑽石，佢話拎第一名嗰個係個好普通嘅女仔，「但佢班粉絲好錫佢，夾埋送咗成百萬鑽石比佢，都差唔多有16萬港幣」。佢笑住咁話，佢坐喺到打機煮餸，就冇人睇，主播同網民互動嗰時，觀眾先多，「可能佢哋喺互動到搵到認同感」。