高海寧同馮允謙今日到鑽石山，出席台南美食節，高海寧話自己好鍾意旅行，每次拍完劇或辛苦工作後，都會搵時間旅行，放鬆自己：「不過因為入咗《愛·回家》之後，都有成八個月冇去旅行，加上呢排又開緊另一套新劇。」高海寧表示本計劃到韓國旅行兼探朋友，但玩時因新沙士於韓國肆虐，故打消念頭：「依家可能會轉去台灣，因為想帶埋婆婆去，台灣好似適合啲。」

高海寧又指擔心住喺韓國嘅朋友：「朋友都話喺首爾好少本地人會戴口罩，通常都係啲遊客戴多，可能因為佢哋未經歷過沙士，都希望呢個病會快啲消失，或者研究到新藥。」

提到亞洲電視成功賣盤一事，高海寧就話冇留意。有指亞視有意向無綫藝員挖角，又會傾歐陽震華等加盟，問到高海寧若亞視向佢招手，可會心動？高海寧話：「我暫時唔會考慮轉工嗰啲喇，一嚟我合約仲有好長，二嚟我覺得公司對我好好。」