李嘉欣同許晉亨拍拖都算高調，每次出嚟見記者，都唔介意同大家分享吓佢哋嘅感情生活，但係噚日嘉欣以愛心大使身份去到尖沙嘴出席有線電視搞嘅「有線HMC實際行動熱線」記者會時，突然宣布封嘴唔再講感情，原因係受咗經理人壓力。
嘉欣話：「我收到經理人指示，唔准我再講關於佢（許晉亨）嘅事，我同公司合作咁多年，一定係有充份理由，唔會點我。」因為封嘴關係，嘉欣仲話明就算結婚都唔打算講，佢話：「冇人知都好，我自己知就得啦！呢方面我冇同男朋友協議過，佢冇畀壓力我。關於我自己嘅事，冇人叫得我郁，除咗經理人。我好希望大家可以關注我嘅工作多啲，下個月我會去美國拍廣告，如果有好戲搵我都會拍㗎！」

「唔會放棄所有」

馮仁昭好想知道點解嘉欣有少奶奶唔做，要咁辛苦拍戲？佢解釋話好想做自己想做嘅嘢，唔會放棄所有，結婚之類嘅事拖得就拖，唔想嘥咗，仲話點解唔做吓嘢喎！
講番嘉欣幫有線個活動做愛心大使，呼籲人捐錢做善事，唔知佢男友係咪鍾意捐錢呢？嘉欣話：「唔清楚，有人做善事鍾意同人講，有人就收埋，我自己就鍾意做，呢啲係發自內心，唔使人叫，好似我唔會問媽咪你做咗善事未。」