原名伍健忠的鬼塚，常出現在80年代初的電影，專演監躉、黑幫大佬等角色。現年63歲的他生得惡形惡相，其實心地善良，先後演出過《四千金》、《江湖最後一個大佬》、《新不了情》、《運財五福星》及《陰陽路》系列等逾五十部電影，演戲是他的副業，正職其實是時裝設計師。

有生意頭腦

現實生活的鬼塚是好爸爸、好老公，生於十兄弟之家，他日前接受《蘋果》專訪時說：「爸爸成日同阿媽搞嘢，搞咗十兄弟，我排第六，第十個因為太窮，100蚊賣咗，細佬伍健民做咗十幾年大律師。」
鬼塚回想入行首部參演的電影是79年的《打藤》，由胡楓監製兼執導，駱應鈞做男主角：「做監躉，一日600蚊。本來話拍一日，見我咁多嘢講、表情好，加我戲。」鬼塚拍戲雖只做綠葉，但非常投入，曾因海報有名而衍生出虛榮感，又自爆曾透過倒影看自己：「突然間回望，心諗『咁X衰格嘅呢個人個樣』，行番轉頭想打佢，嘩！望真原來嗰個係自己。」
鬼塚11歲時父親過身，他於是學做洋服，有生意頭腦的他說：「我可以將1蚊嘅嘢賣100蚊，最緊要係思維同個膽。」85年斥資15萬在旺角開了以鬼塚為名的第一間時裝店，他笑言：「有人行過見到鬼塚個名，話係咪賣棺材㗎！有鬼㗎喎！」跟着分店越開越多，賣衫賺錢，為興趣拍戲。
採訪：楊潔雯
場地提供：鬼塚