有日撞見個舊同學，佢問我呢排搞緊乜？我話有部新戲就快開拍。佢問我係邊個做？我講咗兩個演員名。跟住佢望吓隻表話趕時間，然後大家拜拜，當然最後會吹一吹問幾時出嚟飲茶，但係都心知會係不了了之，不過覺得幾有趣。我幻想我係我個同學，當晚返到屋企同老婆講話撞見麥兆輝，佢話就快拍套新戲有阿邊個邊個做，跟住佢老婆問佢：「咁套戲講乜？」跟住我同學答：「唔知道。」跟住大家對望，跟住上床瞓覺。

可能呢個就係香港電影嘅最大問題，觀眾根本唔關心你班電影人拍乜嘢，亦都唔認為你可以有乜好嘢拍出嚟。只係關心邊個做，但係我覺得唔緊要，精明嘅電影人係應該懂得運用明星制度結合創作後得到最大嘅市場收益。
明星制度係商業電影背後強大嘅支架，呢個係事實，亦都係電影工業本身需要嘅嘢。香港係咁，荷李活更加係，我相信監製唔會好恨拍《機場客運站》，不過史畢堡話拍，湯漢斯睇完劇本又覺得冇乜大問題咁咪拍囉。唔會係一部賺大錢嘅戲，但係肯定唔會蝕錢。呢個就係明星制度嘅保障。
我絕對唔介意同明星討價還價，因為係我嘅榮幸，但係都希望佢哋有多啲空間畀我哋班創作人，大家都係想拍部好戲啫。
過咗兩日，我個舊同學打電話畀我，借口係想約我去飲茶，其實想幫佢個姪女攞周杰倫簽名，我叫佢去搵侯佩岑攞。