【電影大師班】繼彭浩翔、森美、周顯揚等創作人，嚟《蘋果》為同事分享創作心得之後，早前再請嚟ViuTV台長魯庭暉講「何謂創意」！

魯庭暉做廣告出身，現任ViuTV台長，近期hit爆嘅綜藝節目《Good Night Show全民造星》，都係佢有份策劃。被問到點樣同大台爭收視，魯庭暉就話唔會理對方播啲乜，因為去年大台平均收視都係得16點，反之即八成觀眾唔睇電視，所以未必喺16點當中搶人，反而要諗點樣令其餘嘅八成觀眾睇返電視，要做到呢點就要靠創意。

ViuTV開台兩年，做過唔少題材創新嘅綜藝節目，魯庭暉話全憑「失敗」兩個字，「要有創意，就唔可以怕失敗，現階段啲監製sell咩橋，我基本上都會畀佢哋去拍去試，就算衰咗，都總有嘢學到。」綜藝科目前有12位監製，並無規定佢哋要做乜嘢主題，有時會撞到飛起，「試過三個監製同時拍緊杜汶澤，亦都會突然有四個節目一齊去日本。」不過，魯庭暉認為啱啱開台，唔急於建立一個系統，否則會阻礙創意思維。

魯庭暉分享咗一啲監製sell橋嘅趣事，「《入住請敲門》監製sell橋嘅時候話，『我哋拍旅遊拍唔到嘢吖嘛，放心，呢個節目就係一定會拍唔到嘢嘅！不過唔緊要，我哋會放隻眼仔喺裏面，話陰陽眼嘅人睇到嘢。』我話呢個係明目張膽欺騙觀眾。」結果，《入住請敲門》反而贏得一班粉絲支持，仲有得添食開第二季！

而近排HIT爆嘅《全民造星》，魯庭暉話開頭決定做唔做都好似一場賭博：「監製阿花sell橋話做60集港版101，我話照抄人哋呀？佢話唔係，另一回事，係要顯示我哋幾咁無錢咁做！」講到無錢，魯庭暉即刻覺得非常真實，「我哋去韓國或內地睇，人哋嘅飯盒錢，就等於我哋一集嘅製作費！」真人騷夠真係賣點，不過魯庭暉擔心做60集，仲要擺喺黃金時段播出，會冒好大風險，賭輸咗就失去全年四份一業績。最後，魯庭暉嘅決定係基於對花姐嘅信任，「花姐過往做嘅幾個節目都好攞到人性，包括《脫毒工程》、《慳D啦Honey》、《胖伴》等，所以去馬。」

o依家《全民造星》咁HIT，證明佢哋賭羸咗！魯庭暉仲講笑話，家陣最多人問佢《造星》有冇內定，魯庭暉就話自己的確有心水人選，想知係邊個，就即刻去片啦！

精選娛聞，喺晒《娛果》
http://fb.com/appledailyent