謝霆鋒早前同妹妹謝婷婷去咗大譚水塘放生金魚，幫尼泊爾災民祈福，但佢哋咁樣做隨時違反香港法例，而且漁護署一直呼籲市民唔好胡亂放生，因為未必適合養殖出嚟嘅金魚。唔少網民洗版鬧爆霆鋒同婷婷係好心做壞事。噚日5點幾，霆鋒去到中環結志街嗰間即將開幕嘅餅舖拍宣傳片，6點幾離開時被記者問到放生件事，佢笑笑口答：「錦鯉嚟㗎！」之後就上車離開。

《鋒味2》冇青雲

另外，噚日有雜誌報道話近年專心做廚神嘅霆鋒喺新一輯《12道鋒味》搵咗同佢合作緊電影《驚天破》嘅劉青雲做嘉賓，但佢經理人Mani噚日喺電話否認，Mani話：「綜藝節目有配額制，可以用嘅港台藝人數量好少，好多藝人好想請，但請唔到。不過今次有好多女神，有楊冪、周冬雨、少女時代前成員Jessica、林憶蓮。」仲有陳偉霆同羽泉會擔任鋒味家族成員。
據知，第一輯本來想搵王菲出鏡，仲專登就佢預備素菜，但後來霆鋒唔想攞感情事嚟講所以冇拍到。上次冇搵到，啲觀眾梗係想今次有阿菲，但係Mani回應：「暫時冇咁構思。」