噚日有雜誌報道突然爆料，話有線主持一姐劉明軒，同李彩華舊愛、保險才俊王傲山，結婚一年後閃電離婚。有指係因為兩人性格不合，亦有傳係男方家人對明軒有微言，結果離婚收場。該報道更指，36歲嘅劉明軒，已經由本住緊嘅御龍山，搬返去跑馬地娘家，由少奶奶變回「盛女」。

俗語有云，「冇鬼邊死得人」，成個故事嘅爆料人完全掌握內情脈絡。而報道中，亦訪問埋李彩華，佢話:「其實我哋冇聯絡好耐喇!下？咁快？唔係啩，真係好surprise喎!」

今日又有另一雜誌報道，指李彩華獲新歡Thomas送上80萬鑽勞，作為聖誕禮物。而且，兩人只係拍拖四個月。據報道話Thomas係李彩華前經理人趙雪英介紹俾李彩華，月入20萬，優質股。

兩段報道，睇完之後感覺會唔會係:咦？咁啱嘅？兩篇都係李彩華，仲好似for晒佢嗰邊咁喎……之前都有傳，王傲山同李彩華拍拖時，背住佢另結新歡，依家有爆料人分別向兩雜誌爆料，指李彩華搵到個疊水新歡，同埋王傲山離婚。係咪太巧合呢？

王傲山今午三點幾，於網上寫咗篇長文，鬧爆有人放料，仲話自己及家人都深愛劉明軒。「放料人」是誰？矛頭直指舊愛李彩華。

王傲山寫道:「(前略)公眾可能不了解此等技倆，唯傳媒朋友當明白，若果有人把我的私事或常打擾我家人，裝作關心我們然後引導『爆料』(不實的「流料」)給傳媒朋友，『得益』者會是誰？一次、兩次、多次、我之前已攔截過，每次的『得益』者是誰？但是，真的是『益』嗎？真的對演(藝)事業發展有幫助嗎？

「此等低俗行為等同吩咐第三者裝作『爆料』，令致記者朋友拍攝並報道自己『日常生活』如shopping、睇樓、購名牌等等，使之效果有如真的像偷拍一樣。唯一的『貢獻』便是給新人作反面教材。」

王傲山續寫道:「其實想要事業成功，必須從基本出發，腳踏實地，做好自己，不偏門已成功。」呼之欲出了。