擁有36F上圍嘅鄧月平，驕人身材理所當然成為焦點，年紀輕輕嘅佢被標籤做花瓶亦正常不過。銀幕上大癲大肺嘅鄧月平，其實內心收埋好多諗法，因為對自己太苛刻而迷失，更患過情緒病。

21歲嘅鄧月平決心重新出發，日前接受《蘋果》專訪，佢話：「好多謝大家包容我，依家嘅我開始大膽去分享鄧月平嘅心底話，我唔知觀眾接唔接受咁認真嘅我，不過呢個係我最真實嘅一面。」

鄧月平早前推出歌曲《最佳演員》，佢話歌詞入面充滿自己嘅想法：「每人每日都演緊唔同角色，唔係演員先係演戲，人生入面本來就有唔同角色。我係媽咪個女、結咗婚係太太、生咗小朋友就係媽咪。好多人都會有覺得吃力嘅時間，只係睇到自己黑點有幾黑，但睇唔到白點有幾白。時光倒流好多人都想，但係人生冇得NG，不如相信每個take就係最好嗰個take，唔好對自己咁苛刻。我對自己苛刻過，亦搵唔到出口，成日執着自己做得好唔好，其實對錯都有得着，不如唔好咁執着。」

鄧月平話有咗個催眠治療師牌，好歡迎大家搵佢做治療：「我都抑鬱過，嗰時睇麥浚龍嗰套《殭屍》，我覺得好好睇，因為我睇到『解脫』兩個字。其實我做催眠治療師，就係想幫喺情緒病入面迷惘緊嘅人得到解脫。」佢話好彩自己好鍾意聽人哋嘅意見，亦都好感謝入行以來大家嘅包容同鼓勵：「以前大家覺得我好唔正經、講嘢唔知講乜咁，其實係掩飾緊自己嘅不安，平日大家都好少聽到鄧月平講心底話，我依家就試下大膽去講。我唔知觀眾接唔接受咁認真嘅我，不過呢個係我最真實嘅一面。」佢透露自己不時會主動相約有情緒問題嘅fans，希望為佢哋解開心結，但試過有次對方竟然只係想借機「識女仔」：「我當然有唔開心，做咁多嘢原來只係為咗接近你……不過我都有幫過其他人，幫完真係好開心。」

講到音樂，鄧月平直言產量好少：「一年出一首歌，上一首係《女神經》，講真，嗰時公司係為出歌而出歌，有啲人覺得聽完『爽呀』、『正呀』、『好有意思呀』，咁何謂有意思呢？每個人都唔同，有人覺得《女神經》好正，我覺得幫到更多人仲正。好似有次做完訪問，個記者同我講，聽完我講嘢鬆晒，我好有老懷安慰嘅感覺。因為有人同我一樣感動，咁對我嚟講先係收貨。」

場地：mioxplace

精選娛聞，喺晒《娛果》
http://fb.com/appledailyent