難得長假，魏力做咗件好重要嘅事，就係睇番第一季股票月結單，查找不足。逐條數去check，果然有驚人發現，就係原來呢200幾個trade（買賣當一單trade），得兩成有錢賺，一半係打和或輸使費，另外三成止蝕，個別仲輸大鑊！拉勻首季回報20%，好似唔錯，但個倉規模細，炒法不同，不能跟基金表現相提並論。

總括而言，操作上有三大毛病：（1）注碼太大：1月份炒得順，新經濟股幾乎敢買就贏，個心雄晒，股神上身咁款，注碼越來越手鬆，結果2月份散水就倒水咁輸番，好彩仲記得止蝕，唔係要上IFC。

（2）持股太多：買得大不特止，仲要揸足廿幾隻，iPad個list（20隻即時報價）都睇唔晒，兼顧不來，幅圖走咗樣都唔知，走鬼時成個慌失失奇兵，好樣衰！

（3）急住撈底：以為只係震倉，新經濟股一反彈就掃，結果梗係中伏啦，但一斬就彈，再追又再輸，蝕錢都算，信心跌到谷底。
睇番啲交易，引證「八二理論」相當準確，1月份IGG（8002）贏1倍，仲有幾隻賺五成以上，但埋單得20%，就係因為手痕，做太多無謂嘢，蠶食大部份回報，寫出來深刻反省，下季再來檢討。