【新增動新聞】
一般球隊推銷新球季波衫，例牌都係搬幾位球星出嚟做model擺吓「甫士」算數，但睇完蘇甲球隊艾爾聯（Ayr United）呢輯新衫相，唔少男性球迷應該好想球隊瘋狂跟風！艾爾聯近日宣傳2017/18球季作客黃色戰衣，就搵咗一位半祼模特兒玩人體彩繪，將新波衫畫上身，認真誘人！

其實艾爾聯呢條唔係「新橋」，因為佢哋上季宣傳黑白橫間主場波衫時已經用過呢招，雖然惹來唔少爭議，但博彩公司贊助商依然認同宣傳效果，於是食過翻尋味：「經過舊年推出新衫惹來嘅爭議，我哋認為需要改變策略…所以今年我哋嘅人體彩繪唔着主場衫了，改着作客衫！」雖然佢哋希望呢輯相鼓勵球員奮勇作戰，但球隊上季同樣有人體彩繪打氣，咪又一樣喺蘇冠包尾降班收場？