港股兩個星期跌近2,000點，係咪初步回穩都係未知數，而跌浪底部有幾高，就取決未來恒指嘅高度，道理好簡單。保守估計，即使恒指最終跌到27,000點，稍後都有機會反彈接近3萬點水平。如果28,000點就見底，情況當然可以樂觀一啲。

港股今日靠騰訊（700）、平保（2318）等等一批藍籌頂住，其他二三線股繼續受壓，但喺A股偏軟嘅同時，港股下晝終止咗不問價拋售，情況有點兒好轉，可花多一日時間觀察，繼續回穩嘅話，不妨喺優質股之中建返正常倉位。估計跌股多過升股趨勢會一直保持，少數強股估值仍有上升空間，就會繼續強落去，毋須太介懷市寬問題。

今日升嘅股騰訊、平保、舜宇（2318）、瑞聲（2018），前兩隻係靠佢哋頂住指數，累積跌幅唔算深，未掟散之下就有條件繼續保持喺高位一段時間。舜宇同瑞聲係因為短期跌幅過多，於是跟市反彈。至於吉利（175）繼續跌，係因為唔係靠佢頂住指數，累積跌幅唔多、估值亦有Fully valued嘅感覺，面前憧憬因素較少，唔搵佢嚟開刀搵邊個。總括而言，每隻大股進入目前階段，都各有處境，經歷大調整後，洗完牌會出現新嘅兩極化形勢，大家到時要重新識別強弱股了。

晉佳

蘋果財經，關心你飯碗
http://fb.com/appledailyatm