前晚是歌神許冠傑(Sam)最後一場賀歲演唱會,亦是連日來首次爆滿的一場,阿Sam甫開場即說:「農曆年做騷真係困難,○四年開三十八場,都係你哋縱慣咗我,呢幾場嘅空位睇到我心情惡劣,今日爆滿我好開心,好安慰,你哋咁支持我,做人做到破晒紀錄,死都眼閉。」
阿Sam又大讚嘉賓古巨基說:「佢今年好威,樣樣No.1,人又醒目又精靈,我認佢做豹紋契仔。」
基仔亦賣口乖說:「大家留低手上嘅票尾,好有紀念價值,除咗係尾場外,重創咗一個歌手一年之內開四十四場嘅紀錄,超過五十五萬人睇到,我好佩服佢!」說罷更即時下跪敬禮。
超時罰十五萬
阿Sam又宣布總結六場個唱,共收到五萬三千多元利是,他已囑陳達志(Ba叔)和主辦單位加碼至六萬元,全數捐出做善事,Ba叔則透露六場演唱會超時共罰款十五萬。
採訪:李珮洳
攝影:何國豪