港股大跌473點，失守22000大關，雖然大市升跌比例為14︰86，即有近1,300隻股份下跌，但個股洗倉情況未有預期般慘烈，銀娛（027）、金沙（1928）、御泰（555）、金山軟件（3888）等當炒股，更可倒升收場，真係寫個服字畀佢！
不過，始終市場吹緊資金大挪移風，沽盤唔會一兩日就玩完。儲局即將議息，買債規模或會再減；阿爺水緊情況未紓，有傳春節期間會暫停人仔轉賬三日。兩單消息一旦令市場負面情緒升溫，隨時又會掀起新一輪掟貨潮，不得不防。
本欄嚿年多番推介嘅利信達（738）終於報喜，受惠同店銷售增長、毛利率增加以及出售物業錄得收益，全年溢利錄得顯著增長，噚日以破腳穿頭形態炒高半成，距離中線目標價4元又近一步，戰友請坐穩！
今日推介嘅家電股海信科龍（921），擁有兩大賣點。第一，盈喜。集團預期全年盈利最多可倍增至14.4億人仔，市盈率將降至單位數，估值吸引，冰箱及空調產品收入增長亦跑贏大市，加上新型城鎮化大力推動，產品需求肯定有增無減，抵博！第二，圖靚。噚日大跌市下，海信科龍竟反地心吸力衝高5.7%，絕對唔嘢少，若守穩13元水平，可望繼續海闊天空。

唐牛