麥浚龍(Juno)、謝安琪(Kay)噚晚喺尖沙嘴出席新專輯簽名會，今次出專輯會同一間服裝店crossover，推出一黑一白兩件T恤，首批限量版二千件，之後會再加印，Juno話：「新碟講人生概念，想用唔同方法同香港人去分享，感恩反應好，同時又好失落，因為好多人買唔到。」

Juno分享T恤設計概念，胸口有條斷續嘅紅線，係想用簡約方法呈現碟入面嘅message：「紅繩代表姻緣，點解會斷斷續續?因為人生會遇到好多唔同嘅人，好多未知嘅事。」佢仲話呢隻碟橫跨兩年，下年開始會不停派歌，想同唔同品牌合作出單品，亦想開美術展，將拍攝新碟過程嘅相做展覽，兼計劃將MV道具出家品。

Kay笑話休息咗幾年，耐到已經唔記得咗幾時出過簽名會：「我鍾意做簽名會，有個fans仲keep住我八年前簽名會嘅合照，當時好開心，我好開心有人買實體碟支持自己。」

而講到Juno計劃推出為新碟設計嘅單品，Kay就話自己對設計唔太在行，但對着衫就有要求：「希望有件衫成為自己嘅標記，我鍾意好似僧侶嘅連身裙，希望有機會可以推出。」

精選娛聞，喺晒《娛果》
http://fb.com/appledailyent