大家成日話CY喺商界冇朋友，喺銀行界似乎都係差唔多。CY噚日出席香港銀行公會卓越人士午宴，擔任主講嘉賓，佢講咗約15分鐘，期間，在場唔少賓架唔客氣咁做低頭族，一到答問環節更靜晒，十幾秒後先有三、四位賓架畀面提問，令場面冇咁尷尬。

阿媽係女人嘅開場白

CY可能想演講氣氛輕鬆啲，劈頭就話自己係銀行客戶（請問家陣有幾多人會將錢放喺床下底呢？），一直有存款，存款仲係佢主要嘅流動資產，所得嘅回報好低咁話。呢個阿媽係女人嘅開頭，難得在場賓架識得笑，佢哋心裏面其實係咪笑CY唔做較高息嘅人仔定期呢？
CY又講，細路仔嗰陣會幫阿媽去銀行交電費喎，可惜，現場賓架好似對佢講嘢冇乜興趣，好多人低頭玩手機，或者係有急趕公務要處理啩。其實都明白嘅，CY不停講中港金融合作、喺內地開支行同人民幣業務，呢堆資料，賓架倒轉背都背得出啦。
臨尾佢又推銷金融發展局，專登提起金發局上周搞前海論壇，話係為在座賓架而搞㗎，至於金發局有乜大計，佢就話要等報告出籠先知。講開金發局，市場曾經盛傳，金發局想搶金管局嘅嘢去做，金管局總裁陳德霖噚日正好坐喺CY隔籬，唔知兩位有冇冰釋前嫌呢？

李華華
mailto:[email protected]

倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24