日本NHK電視台每年大除夕主辦的《紅白歌唱大賽》，今年是非多多，有傳司儀人選今年遲遲未公佈，係因尊尼事務所內哄，旗下偶像爭做司儀而一拖再拖。更加因為一啲殿堂歌手如中島美雪等表明唔出席，令今年《紅白》冇乜睇頭。而今日有日本傳媒話，《紅白》為增加吸引力將加入動漫環節。

上年《紅白》因為有唱《魔雪奇緣》（Frozen）歌曲環節，仲有日本爆紅動畫《妖怪手錶》人物登場，都吸引到唔錯收視，於是今年《紅白》一於搞個動漫環節，最搞笑係呢個環節都分紅組同白組，紅組司儀係《櫻桃小丸子》嘅小丸子，白組司儀就係《妖怪手錶》人物威斯帕。相信NHK想以小丸子同《妖怪手錶》嘅人氣，吸納小朋友同動漫迷拉高收視。