靚仔同好波唔一定成正比，好似利物浦門將卡利奧斯上季以一副model面孔兼紋身型男姿態空降紅軍，引死唔少女球迷，可惜場上表現同米洛列特似乎不相伯仲，季尾仲爭輸埋正選位畀「米仔」。唔緊要，各位女球迷想睇型男門神，下季有多一個選擇啦！皆因升班馬白禮頓周五宣佈，以破球會紀錄轉會費由華倫西亞簽入澳洲「爆肌」男神馬菲賴恩，25歲嘅佢將會簽約5年，為國完成洲際國家盃後，7月1日就會正式加盟，據報轉會費達600萬歐元（約5,240萬港元）。

馬菲賴恩早年喺澳職效力中岸水手嶄露頭角，2013年登陸歐洲加盟比甲布魯日，2015年更獲華倫西亞垂青，可惜未能搶得正選一席，去季被外借至另一比甲球隊亨克。不過，佢仍然係「袋鼠兵」主力門將，相信有力取代加盟伯明翰嘅大衛史托達把守最後一關。