武漢肺炎 疫情 不斷，特區政府防疫措施半桶水捱轟，唔全面封關，市民人心惶惶，唔少團體組織已經取消咗今年嘅新春團拜活動，避免人群聚集，估唔到都包括埋中聯辦。咁又係嘅，出席得中聯辦活動嘅人，相信大部份都同內地有唔少來往，相對之下係「高危分子」，一個唔覺意感染咗就大件事。

中聯辦喺網頁發公告指，因應疫情嘅防控工作要求，經研究後，決定取消2月4號、5號同7號分別喺港九新界舉行嘅三場新春酒會，係為回歸以來首次取消。中聯辦可能驚有人摸門釘，特別喺叫大家見諒之時，溫提一句，請大家「互相轉告」有關訊息。

鄉議局今日亦宣佈因應疫情嘅最新發展，決定取消每年年初七人日舉行嘅新春團拜，以及年初九喺沙田馬場舉行嘅鄉議局盃活動。而特首林鄭月娥同立法會主席梁君彥早前都鑑於 香港 疫情嚴峻，決定取消原定嘅新春酒會同午宴。