廉署簡介呢一集劇情相當應景,劈頭就話「權力越大,責越大,但掌權者卻可能被利慾冲昏頭腦,利用職權來謀取個人私利。」真係句句到肉,八方建議煲呔聽晚應該捧吓場。〈公.私.車〉劇情參考真實貪污案改編,由「麥包」麥長青扮演機電署高官,阮兆祥飾演嘅「魔鬼」工程判頭為取得合約,借車畀麥包接載JJ賈曉晨、鄭融扮演嘅wet妹四處蒲,最終難逃許志安、陳鍵鋒飾演嘅調查員法眼而被捕。
廉署執行署總調查主劉就榮同八方分享查呢啲貪污案真實經歷,事先聲明,呢個訪問係喺慳電膽事件發生之前做嘅,不過內容都好有啟發性。劉Sir話家陣時代唔同,公職人員貪污好少明目張膽收錢,有啲以權謀私案件,負責官員喺審批合約時冇申報利益,但就將合約判咗畀親戚開嘅公司,就算自己冇得益,都有機會惹官非。
照咁講,長毛要求ICAC開快勞做嘢都好合理。另外較普遍嘅案例,係一啲甜頭式貪污,例如外判商經常請官員免費嫖妓、吃喝玩樂。劉就榮話,呢類個案唔一定要證實到在某一份合約中有利益輸送,只要證實到官商之間有好長時間進行過呢類着數收受都可以落案拉人。