阿姐汪明荃，今日喺將軍澳出席「荃情觸動生命」粵劇慈善演出記者會，阿姐會同衛駿輝於9月1日合演《帝女花》，為靈實基建服務籌款。阿姐話今次演出好有意義，演出《帝女花》有一定難度，佢話：「 因為呢個劇目係好難演，有挑戰，有時我都會探下仙姐，都會問下佢，不過淨係睇佢啲帶，都有排睇。」 問到阿姐會唔會喺屋企練吓，叫家英哥畀意見？阿姐話：「冇喎。」

阿姐表示13號就會啟程去俄羅斯睇世界盃決賽，問到佢捧邊隊？阿姐就話唔知，不過噚晚都有睇比賽，仲讚法國踢得好，家英哥就話比利時踢得好，問到阿姐會唔會着球衣睇波？佢就話：「明星足球隊有制服嘅。」問阿姐同家英哥會唔會有牙骹戰？阿姐話：「其實睇波佢都係攞住個電話同啲波友講，佢叻過我。」

提到家英哥將會獲頒銅紫荊星章，問到到時點慶祝？阿姐話：「未呀，大家都唔得閒。」去俄羅斯個邊慶祝？阿姐話：「唔知呀，應該唔會啩，不過都好期待去俄羅斯，因為未去過。」

問到係咪家英哥感染阿姐鍾意睇波，阿姐話：「我都主持過體育節目㗎！係漢城（現稱︰首爾）亞運，仲報埋獎牌添！你哋唔記得喇？不過依家體育組都解散咗，覺得好可惜，其實政府都推動運動，電視台居然冇咗經常性嘅節目，應該好多人都會畀意見㗎嘞，係有啲可惜嘅。」

精選娛聞，喺晒《娛果》
http://fb.com/appledailyent