高盛大老闆上星期尾畀足心理準備啲員工，留低口訊，指兩三個星期內要全球裁員一成。聽講高盛喺香港有千幾個員工，要裁60至70人，個個部門都有份，大家已經心中有數。
高盛11月底埋數，照計，被裁嘅員工應該可以分到今年大部份嘅花紅，但今年股市、債市都冇舊年咁旺，估計花紅亦冇舊年咁豐厚。
高盛要裁員，大摩又點呢？大吉利是咁講，𠵱家中環人除咗估吓邊個城中富豪投資失利最勁之外，就係睇吓大摩幾時宣佈裁員。聽聞，雖然大摩未講到大規模裁員，但已經有員工自己走人。大摩今個月中先獲日本三菱UFJ斥資702億港銀入股21%，同畢菲特一樣，都係要優先股加10厘息。
老實講，市況咁差，間間銀行都預咗會裁員。做得投行部門嘅，通常人工有番咁上下，佢哋旺市時好捨得使錢享樂，如今裁員風咁盛，華華懷疑，中環蘭桂坊嘅酒吧同食肆，會唔會冷清好多，靚紅酒嘅銷情又會唔會今時唔同往日呢？
李華華
mailto:
[email protected]