郭富城今晚染咗一頭藍髮，同《踏血尋梅》團隊，喺中環PMQ出席《Variety》活動，佢就話因為演唱會好耐冇見呢個團隊：「對上一次都係半年前金像獎，好掛住大家，嚟緊我哋呢個團體好多計劃，同埋今晚嚟呢度想講返呢套戲代表香港，去競逐奧斯卡最佳外語片提名，好光榮，好感恩，畀咗好大鼓勵，呢套戲喺本土都獲得一個大獎，好大榮耀，好大動力拍好電影，仲知我哋再合作拍電影，收到劇本，不過呢個係秘密，我都未睇劇本。」

講到咁忙，城城咪唔可以17年結婚？佢即笑言：「唔係真，係流言。」記者就追問係年份、定件事係流言，佢就表示：「仲知有喜訊會話畀大家聽。」問到會唔會似舒淇拍戲中宣佈喜訊，城城表示：「唔知喎，一直感情事都低調，總之有喜訊會話畀大家知。」問到結婚影響拍戲嗎，佢就話：「冇諗咁多，大家唔好咁多猜想，我忙到17、18年，感情嘅嘢畀啲空間我。」掛住拍拖唔結婚，女友Moka聽到會唔會失望？城城話唔講，再問佢係唔係求咗婚佢都唔肯講，強調今日只講工作。對於梁家輝以《寒戰2》入圍金馬獎，佢就話：「戥所有入圍者開心，入唔入圍，得唔得獎都係緣份，最緊要開心，希望祝福所有入圍者都有good result。」