王友良、艾威、張立基噚晚到九龍灣出席電影劇場版《鐵甲萬能俠:決戰魔神》首映，動畫演唱始祖水木一郎為電影唱主題曲，他專誠由日本來港同大家見面，吸引大批動漫男迷捧場，水木一郎連串唱出幾首動漫串燒歌，台下老幼男迷個個跟住唱呼應，置身其中完全感受到嗰種氣氛高漲。

水木一郎在台上和司儀對談時話已經第五次來港，回想2001年首次訪港時已想在港買樓。今年是水木一郎出道50週年，又係原作者永并豪出道50週年作品，榮幸唱劇場版主題曲，仲話：「唔係太多人可以唱電視卡通版同電影版主題曲，證明我後生，要保持把聲唱得好有一定困難， 但鐵甲萬能俠畀咗好多力量我，可以繼續唱落去， 最擔心係大家睇電影同電視唱版本唔一樣，呢個重新編曲用盡全力去唱。」

王友良身穿著鐵甲萬能俠上衣捧場，佢希望見到水木一郎一面，原本要飛日本都延期，佢話被水木一郎歌曲吸引，去到卡拉ok都會唱，有冇現場粉絲咁狂熱呢？王友良話：「喺日本時我係咁㗎，呢個係男人的浪漫，成個氣氛好high，動漫氣氛同世界所有男仔都會明白。」有冇女仔嫌你太宅先？王友良話：「香港有，日本冇，日本都好多宅女多女仔講動漫，香港女仔會驚咗宅男。不過喺呢類活動，最難頂係大家好投入，出咗好多汗嗰股氣味好吃力，男人味好濃郁，我頂得順，因為自己之前搞好多日本藝人活動，好似AKB活動男人味更濃烈，我都習慣。」

艾威有份主演香港電視劇集現在奇妙電視平台播放，艾威話：「除咗可以更多曝光外，最主要係將心血俾多啲人睇到，唔好白費咗，如果有需要出嚟宣傳樂意幫手。」

精選娛聞，喺晒《娛果》
http://fb.com/appledailyent