對於新盤回報率低，資深地產分析員張一鳴表示，如果住宅物業回報率不足2厘，基本上，扣除物業稅，回報再少啲，甚至無得賺，一加息，即時倒貼。另一方面，換租客，可能有兩、三個月是無租收，更加入肉。

他指出，現在買樓收租回報已經非常唔吸引，對於仍有人蜂湧入市，他認為：「佢諗法可能是恐慌嘅，覺得買咗會安心，瞓得著覺嘅；又或者覺得樓價會不斷升，像97年，大家唔係諗住收租嘅，係諗住升值。」如果收租回報襟唔到成本，實質上，持貨能力一路減弱，如果美國明顯加息，對市場會有壓力。

對於低回報率業主而言，「加少少，心理影響大，每個月比多少少錢，一路計住，越來越加，入肉程度越來越痛，加息無加到1厘或2厘，對市場整體反應不大。但對於這些低回報率業主來講，加1厘，已開始有反應，覺得一路補貼，開始有壓力㗎啦!」

回報率持續下跌，仍有人蜂湧入市，張一鳴認為：「咪就係恐慌性囉!市場已經好明顯地唔理性，覺得樓市長升長有，唔會跌嘅。好多人覺得全球咁多資金，係唔會跌嘅。呢啲咁嘅諗法，每一次係泡沫高峰期都有咁嘅理據出現。而家啲泡沫並非純粹分析角度可以講到，包括全球印銀紙、港府政策失誤、國內放水收水情況，這些都是香港無辦法可以控制。呢啲都唔係可以合邏輯去分析，只可以講而家是非常之危險，但係咪聽日爆，抑或幾時爆，無人能夠講得到。目前樓市實際嘅情況，係處於比較高嘅危險嘅水平。」

掌握財經生活資訊，即Like「蘋果ATM」fb專頁啦！
http://fb.com/appledailyatm