有指家英哥發燒入院,記者致電家英哥,問到現時情況,說話有啲氣若游絲嘅家英哥話:「冇乜事啦,有心,𠵱家退咗燒,我聽日都出院㗎喇。」佢之後接受傳媒訪問,自揭並非一般發燒,佢指早前要做前列腺細胞檢查,進行一個穿刺手術後,到橫店開工期間細菌感染,加上欠缺休息,所以便發高燒至超過40度。
阿姐汪明荃噚晚錄影節目時,交代家英哥情況:「佢𠵱家喺醫院休息,已經退咗燒,冇乜事喇,之前發高燒發到40度,我幾驚呀!」阿姐指家英哥早前到橫店拍戲時受到細菌感染,為免影響進度,寧可日間返片場開工,夜晚回醫院接受消炎治療,估唔到家英哥一返港又發高燒,所以即刻入院治療。阿姐指家英哥入院撞正佢神功戲演出,但都有抽時間煲湯水同探佢。
撰文:馮仁昭