一個疑似懷孕嘅大肚婆偕同男伴，前晚喺旺角一間影音店內聯手「快閃」盜竊，30秒內偷走4件價值約600元嘅手機配件後逃去無蹤，以為神不知不覺，點知整個犯案過程被店舖閉路電視拍低。店舖經理盧先生發現後，為免孕婦要坐監甚至獄中誕嬰，同上司商討決定畀孕婦一個機會。盧指若兩人喺昨晚6時前現身付款可視作和解，但最終兩人並無現身，只能報警緝拿雌雄賊。

30秒掠走4件貨

根據影片，前晚約10點47分，當時店舖即將關門，一名着黑色孕婦裝、腹大便便嘅女人及着綠衣男人喺店外出現。綠衣男一現身就毫不猶豫行入店內走到目標貨架，30秒內敏捷地偷走一個75元嘅「手機分插」（供同時充電及插耳筒聽歌）以及2個238元嘅「手機HDMI分插」（將手機聲畫接駁往電視播放），閃電手將賊贓收藏進褲袋及褲內。同時間黑衣孕婦喺店外貨架食煙及四處觀望把風，待綠衣男成功偷走3件貨品之際，孕婦亦動手偷走店外貨架一個價值30元、固定手機喺車上嘅支架，之後一同離去以為神不知鬼不覺。不過成個過程被天眼拍低，店舖經理盧先生指對方出手很快，但他有留意店內存貨，故收舖時留意到有兩個「手機HDMI分插」失蹤，思疑下翻查閉路電視紀錄揭發事件。
盧先生指按公司規定若確認有盜竊案必須報警，但考慮到孕婦或隨時要在獄內生BB，連累BB無辜坐監，希望孕婦能為BB樹立個正直榜樣。佢 向上級報告，商討後決定行使酌情權，透過傳媒及互聯網把盜竊影片公開，並下通牒假若噚晚6時前，雌雄賊能現身帶同貨品前來該店「付款」，店方將既往不咎，又懸紅4千元追尋兩人下落。《蘋果》噚晚致電查詢，盧先生話兩人在時限前最終冇現身，上司於是報警處理，佢坦言對事件感可惜。