章子怡同汪峰喺2015年結婚，之後生咗囡囡「醒醒」，今日係囡囡3歲生日，汪峰喺微博貼出一家四口家庭相，汪峰同舊愛葛薈婕所生嘅囡囡「小蘋果」都有出席，「小蘋果」抱住小貓、企咗喺繼母章子怡身邊，而章子怡為「醒醒」準備咗一個米妮蛋糕，醒醒更扮咬米妮嘅耳仔。

汪峰原來寫咗一篇語重心長嘅說話讀俾「醒醒」聽，話畀囡囡知呢個世界上，最重要係陪伴，想寶貝女明白快樂同財富地位無關，與容貌際遇無關，教導囡囡學識感恩，珍惜父母陪伴嘅所有時光，「感恩媽媽拖着受傷的身體帶着你玩耍的那些日子；感恩她給你講故事陪着你甜美入睡的每一個夜晚；感恩阿姨不辭辛勞給你的無微不至的呵護」，願囡囡能夠一生幸福，成為一位真正快樂嘅平凡小姑娘，希望囡囡慢慢學懂自己尋找快樂，認為「爸爸媽媽甚麼都能給你，惟有快樂，我們無法承諾」。

汪峰又指等囡囡長大後，就會明白呢個世界並唔係想像咁美好，「沒有童話，沒有精靈，沒有戰勝邪惡的正義魔法」，活着要無畏，時常保持微笑。

老婆章子怡都喺微博轉載汪峰留言：「爸爸依偎在我們身邊一字一句唸完這段話，我早已淚流滿面，而醒寶也是安安靜靜地聽着，她趴在我懷裏，瞬間覺得那個頑皮的小傢伙懂事了。或許她只能聽懂之言片語，但我相信長大後，她一定能明白這是爸爸送給她的最好的禮物！祝福我們的寶貝平安、快樂一生。」

精選娛聞，喺晒《娛果》
http://fb.com/appledailyent