立法會房屋事務委員會，原定昨日早上八點半開會，但玩法再變，議員索性唔玩遲到玩冇到，連有備而進場後玩嘢博被趕出議事庭提早收工都慳番，更為核突到集體冇到。賴時間太早？幾多港爸港媽，這個鐘數已湊完細路返學，幾多打工仔亦已在趕返工，幾多金融街之狼都已經開完早會啦！賴唔想晨早見到不想見的物體，拒絕聽運房局局長張炳良廢噏？但既然講明內容關於施政報告簡介，即係香港人的房屋事務，姑且也可簡稱為全香港的「房事」，香港人最關心的問題，難道遠不及及政棍自家的房事重要？

解釋即係掩飾，難為香港納稅人連年進貢，竟然流進了一群短視政客之口袋，對於呢班只懂出糧收足錢、但肆無忌憚no show曠職的員工，作為納稅人、作為你地老闆，既無法炒你哋魷魚，又唔可以揀唔出糧予個別人士，真係好嬲好無奈！早點起身去聽局長講嘢，係你哋職責所在，似乎你們已忘記了自己的工作性質，是為香港人服務。如此下去，香港納稅人仍出糧給這群只顧各懷鬼胎、視「議員」為筍工、卻連戲都不肯交嘅人，香港人不正正是被明搵笨嗎？
終日玩嘢擺姿態、整色整水，簡直是愧對選民，當物極必反，當香港人對一眾政棍有到冇到都已經冷感，不再對你們的所作所為畀反應，也許就是正中下懷。你們的失職，是欠香港市民一個交代，更欠出糧畀你們的納稅人一個更大的交代，難怪有賓架索性提早退休炒賣窩輪，旨在唔想再交稅養廢柴，點解炒輪唔炒股？因為連印花稅都想慳番，以發洩對政棍的不滿。
連續兩日提及指數反彈條件與誘因，同樣只是基於物極必反道理，資金係時候迷途折返、鳥倦知還，即使只是暫時性，從虛擬回歸現實的資金重新調配，從高風險當炒股換馬以降持貨風險而已，炒期指貴乎乘勝狙擊去到盡，炒股票就不一樣，去盡隨時變輸突。

胡孟青
獨立股評人