德甲多蒙特王牌奧巴美揚到2020年就約滿，而多仔總監索克就話，奧巴已經同球會續多一年約，實情叫其他球會唔好打佢主意。但索克都講到明，奧巴美揚唔會喺多仔「終老」，終有一日會離隊。

奧巴美揚今季德甲上陣15場攻入13球，係多仔嘅首席射手，索克就話已經同佢續多一年約，仲話:「有一日，佢一定會離開多蒙特，佢唔會喺呢度結束職業生涯。對於我哋嚟講，佢係極之重要嘅球員，我哋會繼續為佢籌謀。」

德國傳媒就話奧巴美揚加咗人工，但加幾多就未有公佈。雖然主力，但索克都不留情面咁批評佢，暗示佢係遲到大王:「奧巴係一個特別嘅球員，佢擁有非凡而且精彩嘅個性。我哋之間亦存在唯一一個問題，就係準時嘅問題。我哋一定要搞清楚呢個問題。」

查實奧巴上個月先因為遲到被多仔內部停賽，索克今次真係話得佢啱!

--------------------
狂賀！BFB系列推出5​周​年，精彩活動為您安排，立即登入速享專屬優惠！ http://bit.ly/2xrTKGM