李若彤同古天樂喺95年拍《神鵰俠侶》之後，憑住姑姑小龍女一角一鳴驚人，更加被譽為係史上最完美嘅小龍女，其古裝扮相美若天仙，更加吸引到唔少觀眾成為fans，而除咗小龍女之外，李若彤仲有唔少角色令人印象深刻。

就好似同樣以金庸小說改編，喺97年播出嘅古裝劇《天龍八部》咁，同樣係古裝扮相嘅李若彤，呢一次就挑戰一人分飾三角，分別飾演王夫人李青蘿、神仙姐姐齊御風同埋女主角之一嘅王語嫣，結果大受觀眾歡迎，劇集亦成為經典之一。

除咗電視劇之外，李若彤就同90年代一眾藝人一樣影視雙向發展，喺大台拍劇期間亦有出演唔少電影，而當中比較為人所熟悉嘅角色都應該係周星馳主演嘅電影《大內密探零零發》入面嘅琴操姑娘，戲中時男時女嘅打扮真係另有一遍風味。

不過去到04年，李若彤就因為愛情而選擇淡出娛樂圈，推晒所有電視劇及電影，不過最後都係分手收場，直到13年就接受曾志偉邀請重返大台拍攝《女人俱樂部》，正式回歸演藝圈嘅李若彤今次就唔再係以仙氣古裝打扮出場，而係扮演師奶阿媽，雖然係咁，但係劇集喺14年出街之後一樣大受歡迎，更帶挈劇中年輕一輩彈起。

雖然拍完《女人俱樂部》之後李若彤就冇再喺大台開新劇，但係最近佢就接拍咗大陸網絡小說改編嘅電視劇《鬥破蒼穹》，再次以古裝扮相演出，而今次佢就飾演男主角嘅阿媽，更係劇情關鍵角色之一。