賭王三房千金何超蓮噚晚去咗銅鑼灣，出席香港青年聯會搞嘅論壇講座，佢就負責講Talk，分享夢想、創業，對象係一眾大學生，佢笑言話好適合佢哋個Smile with us HK吸納嘅人，仲專登整咗100支波板糖送畀佢哋。

超蓮喺會上講到自己喺IG、微博平台理念，同創業之路嘅辛酸，佢話：「最緊要係搵到自己想做嘅嘢，咁就唔覺得辛苦。」佢成立嘅慈善團體嚟緊都會有好多計劃，聖誕節有一個願望樹計劃，會送禮物畀小朋友，超蓮話自己都出心出力，時常捐出屋企物品做善事，亦會叫埋家姐參與；另一個活動就係探訪長者，會派一啲保暖衣物畀佢哋，今次得到服裝品牌贊助，可以令長者有適合禦寒衣物。

提到聖誕節，超蓮就選擇留喺香港過節，因為舅母仍然喺醫院，所以唔會飛，佢仲話現時冇追求者約：「我宣傳咗咁耐話唔想拍拖，嚇走哂啲人。」記者叫佢o依家宣揚想拍拖啦？佢即刻耍手擰頭：「唔好啦，唔好咁樣害我，o依家我宣傳創業。」問到佢見到現場大學生有冇合眼緣對象？超蓮笑哂口話：「人哋可能嫌我係阿姨呢。」接唔接受姊弟戀先？佢話：「我唔知呀，未試過，不過頭先講talk時見到啲靚仔靚女幾四正。」問到超蓮會唔會同大家交友？佢話：「梗係啦，我哋嘅平台係年輕人認識年輕人交友做善事。」

更多娛聞，喺晒《娛果》
http://fb.com/appledailyent