今早德勤先至宣佈將招標出售亞視10.75股份，同日亞視大埔總台有一個好重要嘅節目錄影——就係《ATV這一家》喇！執董葉家寶、副總裁趙汝強、羅霖等現身錄影。呢個《ATV這一家》，就係亞視自製節目，向你獨家亞視情況。

亞姐出身嘅羅霖話，聽到亞視今日搞到咁樣，覺得好心痛，佢公司有贊助亞視《把酒當歌》，加上對亞視有感情，故幫得都會幫:「我係亞視出身，我真係好感觸，頭先錄影節目嗰陣都爭啲喊出嚟。我對亞視好有感情，好熟悉台前幕後所有人，個個都係我朋友。佢哋又要交租養家，又冇糧出，我都希望佢哋有多啲正能量。但見大家都緊守崗位，睇得出佢哋嘅正能量。其實我都識咗家寶好多年，都好擔心佢嘅身體。」

羅霖又話有競爭先有進步，亦可以提供更多就業機會，但聽到有啲人話亞視死不足惜、「唔好喺度XX」，佢話好難受，故就連「XX」代表嘅「獻世」二字亦講唔出口。

另外前DJ梁安琪都話拎咗十萬蚊出來喺亞視落廣告，宣傳旗下品牌，出錢出力支持亞視。

至於葉家寶就話，對於德勤宣佈招標出售亞視部份股份，佢就重申總之十一月份另一半薪金，就快可以發放俾員工，依家佢哋張羅緊十二月薪金。葉家寶又話同蔡衍明講過，如果自己有乜嘢係做得唔好嘅，請對方指出，佢會改正；又表示已收到勞工處17張傳票，但刻下主要就係為員工爭取股東注資同出糧喎。