一年一度嘅工展會下周六（15日）又嚟喇！凡有工展會例必有超低價貨品畀市民搶，今年為慶祝工展會舉辦80周年，有原價8,000元、包埋濾水器和蒸鮮鍋的「電器鮑魚福袋」，同埋原價5,480元嘅分體式一匹冷氣機，以及另外六款產品，喺展期首天以80元超級優惠價，限量發售畀首八名買家，大會仲會喺開幕前一晚嘅夜晚9時，為八款優惠產品設八條隊，當有64名市民排滿就截龍。主辦單位香港中華廠商會聯合會除咗推出八款80元超級優惠外，又會另分四期推出一蚊同一折產品優惠，例如包裝掛耳滴漏咖啡、電子體溫計和健康食品等，都以一元限量發售。

今屆工展會有880個攤位，共430個參展商，由本月15日到下月7日，共24天展期，今年門票加價2元，每張12元，係20年來首次加價。廠商會展覽服務有限公司主席徐晉暉話因成本上漲，展場承建商等都有加價，所以今年年門票只稍加2元，而每天首800位現場購票人士，則可獲贈飲食贈品，如茶包、咖啡等。