【李八方online】遭袁弓夷質疑「有重任」 林卓廷反擊：重任就冇 重刑就有！
蘋果日報 2020/09/08 13:59
袁弓夷林卓廷
新晉長者級KOL袁弓夷嘅論政片段近排大熱，佢近日指控民主黨林卓廷嘅說話藝術同前立法會主席曾鈺成一樣，辯論時候扮客氣，製造分化，「呢個人不要小看，將來會有重任」。面臨暴動罪罪名嘅林卓廷就拍片反擊，話自己「重任」就冇，重刑就有，對袁弓夷嘅指控，感到難以理解。
阿廷喺片中話十分尊敬袁弓夷，對方始終係前輩，強調自己對同路人一直十分客氣，並非心懷不軌，希望袁弓夷勿誤會。佢話唔知自己將來有咩「重任」，反而「重刑」就喺佢面前，因為早前被控7.21暴動罪，仲未知道律政司會否加控其他罪行，對袁弓夷話佢將來會有「重任」，感到難以理解。
至於袁弓夷片中反對民主派接受延任一年，林卓廷話，其實今時今日做立法會議員，成本好高，一隻腳已踏入監倉，留守議會其實係有不可推卸嘅責任，但最終去留交畀民調決定。對於袁弓夷話民主派接受延任係自私賣港，林卓廷不敢苟同，「呢個批評似乎用詞太過，亦都係誤解我哋。」
阿廷強調去年至今嘅整場反修例運動，關鍵在於不分化、不割席，兄弟爬山，各自努力，大家即使看法不同，但不應以強烈字眼批評同路人。
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！