有「娛樂大亨」之稱嘅林建岳旗下一間新餐廳與hmv銅鑼灣旗艦店齊齊選擇今日開張大吉，今日肯定係大好日子。風水師麥玲玲都話，是日屬大吉日，宜開市、交易，呢日開張，財運可望穩步上揚。
麗新發展（488）大股東林建岳嘅餐廳真係越開越多，早排先至喺中環開咗間專食靚牛扒嘅Beefbar，今日又有高級私房菜開張，岳少至今已有14間餐廳。

私房菜館午市每位千元

新開呢間餐廳跟「好酒好蔡工作室」創辦人蔡昊合作，喺中環建設銀行大廈設「好酒好蔡」，建行大廈前身係麗嘉酒店，原本由麗展持有，後來將一半股權賣畀建設銀行（939），2008年雙方將麗嘉拆卸重建為𠵱家呢幢建行大廈，因此，岳少今次將好酒好蔡設於建行大廈，多少可能有啲情意結。
蔡昊創辦嘅好酒好蔡係廣州出名嘅私房菜館，周潤發、劉嘉玲等明星亦有幫襯。在港開設嘅分店，有5間房，普通晚飯每位至少2,000元，午市每位至少1,000元，必須預約。聞說岳少老友唐英年今日或親身到賀。
另一邊廂，試業咗一輪嘅hmv銅鑼灣店，今晚亦有開張儀式，聽講呢邊亦星光熠熠，鄭秀文、林子祥、Twins、RubberBand、太極等歌星、樂隊將會現身，部份先坐巴士喺銅鑼灣巡遊，再入店內參觀。特別嘅係，公司管理層希望hmv呢個品牌較型，新店開張唔會剪綵咁老土喎。

李華華
mailto:[email protected]