馬浚偉開live為抗癌歌手李明蔚搞眾籌：有一個機會可以醫治都會試
蘋果日報 2020/09/17 17:48
馬浚偉李明蔚
（網上圖片／影片截圖）
抗癌歌手李明蔚（Sarena）在2012年發現罹患罕見的腺樣囊性癌，8年來一直堅強對抗病魔，上月Sarena在社交平台留言表示近來感到身體痛狀有所不同，雖然仍然可以頂得住，不過言談間透露自己的身心很疲累，不知道還可以撐多久，希望嘗試免疫療法。向來視Sarena為妹妹的馬浚偉，昨晚開live為Sarena在網上作出眾籌呼籲，並為她打氣。
馬仔表示在疫情期間與Sarena一直保持聯絡：「呢個傻妹話自己身體越嚟越弱，我都知佢而家嘅狀況，可以做到嘅嘢都已經做晒，我都有問過相熟醫生，佢哋都話暫時未有方法。Sarena頭先同我講，做到都做，乜都試吓，佢知道有免疫療法，但費用真係好昂貴，佢嘅經濟唔係咁好，一定會有壓力。」直播期間馬仔亦多次為Sarena打氣：「Serena 加油，好多人支持你，我明白家人好辛苦，亦會替Sarena擔心，我知你哋好難過，請畀自己難過，但難過完要繼續振作。」他更唱兩次Sarena《交換愛情》：「冇人想病，既然真係病，唯一方法係樂觀面對，盡力去醫，幾唔想接受都要接受。」
馬仔坦言治療癌症的過程很漫長，他的媽咪和妹妹亦先後確診，所以很明白作為家屬的心情：「任何一個生命，有一個機會可以醫治都會試，況且佢仲係咁後生，我都叫佢唔怕講，等多啲人可以支持，我自己從來都唔呼籲人哋share我啲post，不過今晚希望大家幫手share，等多啲人知道。」
《蘋果》今日向馬仔了解，他說：「佢冇同我講成個療程嘅費用，但以我所知要接近200萬，數目都幾龐大，我都有叫佢了解點樣先可以搞合法眾籌，再同屋企人商量，等佢完成咗之後，我會搵演藝人幫手share，等多啲人知道。」
Sarena在2012年確診後，半年內做過38次電療和4次化療，又接受過多次手術，情況一度轉為穩定，但到了2016年舊病復發，更出現口齒不清、半邊臉癱、右耳只得3成聽力、右眼無法閉合。去年癌症再擴散至肺、肝、腎等器官，病情反覆。
馬仔在FB出post呼籲，李明蔚表示感動。（FB截圖）
李明蔚回覆網民的留言。（FB截圖）
馬浚偉視李明蔚如妹妹般看待，多次支持她實現夢想。（資料圖片）
李明蔚上月表示覺得身體的痛不一樣。（FB截圖）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！