堂堂內房龍頭老細竟然養豬？原來中國海外（688）話事人孔慶平（孔總，圖），未入大學之前就養過豬，真係靠豬搵食㗎，而且佢養嘅豬生產能力仲唔錯，一年埋單豬嘅數量足足多咗兩倍！
孔總噚日就同華華講，佢未入大學之前（傳聞係文革時期），日子好艱苦，為咗搵食曾經養過豬，佢話：「最初養嘅時候只有100隻，養咗一年就增加到300隻。」不過佢話：「嗰時一日人工只係3毫子，兩斤白米就去咗一大半，剩番嘅連菜都唔夠錢買。我哋唔會食飯，只係會食粟米同蕃薯。」
查實孔總都只係養咗一年，之後就轉咗做電機工人，總算夠錢開飯，仲有錢可以買菜食㖭，嗰時佢就開始日頭做嘢，夜晚讀書，成功考入大學讀建築，雖然畀其他同學仔遲咗五年先入學，畢業後都入咗中海，仲做得好成功㖭。