利物浦今晚夜場將作客白禮頓，但後防主力祖爾麥迪比就再因大腿傷患缺陣，據報起碼唞一個月，嚟緊嘅聖誕快車靠晒洛夫雲同埋卡拉雲。

高路普周四出席賽前記者會，證實麥迪比受傷嘅消息：「祖爾麥迪比應該唔踢得，佢上場對完史篤城之後就有啲不適，都係關於肌肉嘅問題。我哋要作最後評估，但佢周六好大機會唔出得。」而據英國《每日鏡報》報道，麥迪比至少缺陣一個月。

缺少麥迪比後，高路普可用嘅中堅就只有卡拉雲同埋洛夫雲。卡拉雲因病缺席上輪作客史篤城的比賽，而洛夫雲則無病無痛。紅軍接下嚟大戰連場，下周四要喺歐聯主場對莫斯科斯巴達，三日後又要回師英超出戰默西賽德郡打吡，如果「雙雲」有咩病痛，利記隨時崩盤都似。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM